الأحد , 11 أبريل 2021
1 Star2 Stars3 Stars4 Stars5 Stars (No Ratings Yet)
Loading...

قصيدة “المنحنى والضلع” للشاعر: فهمي ريان

المنحنى والضلع
والاعوجاج فى الروح
جعلو الفراق مسافات
قتلو الحنين للبوح
طلت بخلخالها . خطت عينيها الارض
قلبى تعب م السرد . افعالها مجنونه
يوم تبقى عز البرد . يوم دافية وحنونه
ومحملة الالوان فوق حمل بهتانها
قلبى فى وقت العرس مستنى فستانها
وأدانها وقت الفرض بيغير المواقيت
وعقارب الاوقات لسعتها ما تابت
العقل مش ثابت . معجونه بالعفاريت
خطفت نجوم م الارض ورمتها ع المريخ
ما سمعتلوهشى صريخ
يا معلمانى الحب . الحب مش توبيخ
تهدي الهلال لبلال يقطم بلال قطمه
عشمان فى بوسة خد ما يلاقى غير لطمه
كبر الهلال يا بلال آن الاوان فطمه
يا فاطمه ليه تزعلى والقلب ليه زعلان
الفيلم ما كملشى ؟ فرق خطاه إعلان
انا شعرى مش للجهل . او بحر . نيل . او سهل
او بحر صعب وسهل . مستفعل فعلان
التربة طرحت تمر . لاجل النياق الحمر والفارس الأسمر
النخل ما أثمر
والحلم ما كملشى وأذاك كتير قلبها
لساك وبتحبها رغم السراب والزيف
الاصل حد السيف . الفرع خنجر غدر
قلبك ك ضى البدر . واتمس من مارد
يا حضنها البارد . قلبك مهوش ونسان
لو إيد ولمست خد . ما تردهاش بلسان
يا قاضى يا عادل . الظلم ليه طول
بتفرق الاحكام . طب قولى م الاول
كنت اشتريت فدادين من قوس قزح سرقة
اللعنه ع الفرقة . والمجد للمجاريح
كونك فى وش الريح رحتبكى وبحرقة
الورد اصله صريح . يا بتجرحك شوكه
يا حنينه الورقة
ما تزودو المرقة وتزودو الاحزان
ان هللو الخايفين فاللعنه ع الفرسان
اللعنه ع الفرسان .

شاهد أيضاً

قصيدة عشقتك وطني للشاعر محمد عبد العال آدم

أنا من يضحي بكلِّ الغوالي لأني عشقتُ ترابَ الوطن عشقتُ الروابي و صوتَ السواقي و …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *