الأحد , 11 أبريل 2021
1 Star2 Stars3 Stars4 Stars5 Stars (No Ratings Yet)
Loading...

قصيدة “فى الحضرة” للشاعر: فهمي ريان

فى الحضرة
بتتجمع قلوب الناس . وتصرخ روحها فى الملكوت
قناديل السما الخضرا . بتتفرج على الجوهر
بعين عاشقة وماليها سكوت
حيطان موشومه بالعمبر . ودف وزار
وزاير دار بيتمسح فى حضرة كل شىء موجود
سلاسل نور . وروح رايحه تعدى بحور
وناس نادرة كلام الروح ماليها خشوع ومش قادرة
عقول الناس بتستنظر ترش بخور
وخلق الله ومولانا العزيز يبدأ يحرر سجن عشاقه
وتبدأ رقصة المساطيل فى دنيا النار
تسافر . ترتجع . تشهق . تضم الجسم 100 ضمه
وتنزع منه اوجاعه . صراخ ونحيب لكن بالصمت
حنايا القلب بتفرغ سواد المشهد المنكوت
وتبدر ع الجراح هالة تشع امان
قلوب بكاية تترجى تجلى النور . على الدقه وعلى التهليل . فى حضن الليل . بتفتح فوهة بلور
وتتمايل كما السكران . يمن عليهم السجان
ويفتح طاقة محمية من الانسان . ترد الذكر بالعرفان
وتنورة وجع بتدور . وناى بكاى .
وتسبيح الخلايق سور . يوحد روحك التايهه يا بنت الليل . ودرويشك بيتطوح مع الدراويش
يا عاشقة لكل لحن حزين . وكل حكاية للعارفين .وكل ضريح وكل مقام . ضرير زاهد بأشواقه
تمللى بينجلى صوته بذكر الشوق
وتحت القبة يتطوح وما بيفوق
ملاك انسان كما اصبح . يلف يدور . يعيش مستور
بينده ع المدد والحور
وفجأه فلاش . ونور غيب عقول الناس
وصوت مسحور
صحيح إنسى . لكن عشمان . بيدخل جنته الخضرا
يفوق على خلق هيمانه ودايرة تلف ف الحضره

شاهد أيضاً

قصيدة عشقتك وطني للشاعر محمد عبد العال آدم

أنا من يضحي بكلِّ الغوالي لأني عشقتُ ترابَ الوطن عشقتُ الروابي و صوتَ السواقي و …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *