قصيدة ( إتهام ) للشاعر: وليد المصري

إقطعى الشك باليقين
وابعتيلى خفافيش الظلام
إنصبى الفخ فى كمين
وإعمليلى الف محضر إتهام
حاكمينى فى جلسه خاصه
قولى ممنوع الكلام
كونى القاضى والسجان
لبسى توب البراءه
للى باعك وخان
واحبسينى لأنى ليكى
كنت عاشق مش جبان
صدقيهم لو قالولك
إنى كارهك وإنى خاين
وإنى بايعك من زمان
ما إنتى غاويه تكدبينى
وتسمعيهم
نفسى مره تحسى بيا
تقرى نظره من عنيا
وتفهميهم
هتلاقينى بكل نقطة
دم فيا
عشقى ليكى يفوق
حدودهم كلهم
صحى قلبك حبه ليا
قولى حاجه وإنجدينى
وعرفيهم
ظلمانى دايما والحقيقه
معاكى مره
نفسى افرح فيكى لحظه
نفسى اشوف العدل مره
بلى ريقى بكلمه حلوه
صحى حبك تانى فيا
شيلى غيمك والسحابه
لسه شمس العمر جايه
من النهارده ياحبيبتى
قلبى رافض الإستجابه
رافض إنه يعيش ضحيه
وسط دوامة الغلابه
نفسه يسمع كلمه واحده
هيه حكمك بالبراءه