أنا والإسفلت

img

أسفلت الشارع ..
رافض إن يكون أسفلت !
عاوز يكشف شيىء مستور
ويقول شكواه ..
عاوز مره يبووووووح ..
أسفلت الشارع ..
رافض إن يعيش مصلوب ..
فى زمن .. مقلوب
كان قال لي :
مش حيرحب غير بالرجل الحافية
الساعية الداعية لخير الناس ..
أما الرجل الدافيه اللابسه مداس
اللى ف يوم ..
لو طالت تعفص فوق الراس
مش راح يسمح .. إنها تمشى على الإسفلت
أو راح يسمح .. إن كرامته ف يوم تنداس
أسفلت الشارع ..
لسه مصمم يمشى بعيد ..
وانه عنيد ..
كان قال لي :
لو كل الناس سواسية فى شيل الهم ..
والشمل اتلم
وما فيش زلمكة وناس مطحونة بتطرش دم
كان أسفلت الشارع ..
يهدى الرايح ويا الجاي سلامات
ويسلى الخلق يقول حكايات ..
وان كان باقى من عمره ساعات
أنا كنت حاشاركه فى أحزانه
بس خسارة اسفلت الشارع ما استحملش
وما خطش فوق الشكوى غير
أحزان وتلات دمعات ….
الأولى شربها واحد ما بيرحمش
التانيه نطقها ف كلمة وما كملش
التالته حبسها ف دمه .. طفحت هم
فطق ومات …..
فكتمت الآهة في قلبي وقلت :
ميت ألف خسارة على الإسفلت
ميت ألف خسارة على الإسفلت
شعر / أشرف ناجي

مواضيع متعلقة