راجع أكيد

img

راجع أكيد

شعر / أشرف ناجي

ممنوع عليك الزقزقه .. فوق الشجر يا طير

كان الفضا .. راسم حدودك للبعيد

دلوقت أصبح للفضا قضبان حديد

ممنوع الضحك واللبس الجديد .. حتى الونس

ممنوع عليك  .. ويا الصحاب

ممنوع عليك اللمس .. حتى الإقتراب

ممنوع عليك حتى النهار  .. تفتح له باب

أو يوم شعاع الشمس يدخل .. للمكان اللى انت فيه

كان الوطن جواك كبير

هو الملك وانت الأمير

ورسمت عشقك للوطن .. وشم ف جبين من يعشقوك

ولا كنت تعرف إنهم .. يوم حيبيعوك

لكن ياطير ….

لما حاولت تبين الكدب  ف عنيهم  … أنكروك

فحاولت تنزع وشم حبك من جبين اللى خانوك

ما لقتش وشم ..

ما لقتش غير  حبة ملامح  .. باهته من فوق الوشوش

ياما حاولت أصدهم  وأردهم ياطير

ما لقتش حد يدلنى  .. عن معنى كلمة خير

للحلم نصبوا مشنقة

حرموك يا طير  م الزقزقة

كتبوا على قلوبنا الشقا

كتبوا علينا الغربة جواك يا وطن

فهاجرت يا طير للبعيد ..

لكن حدودك عندهم متحددة

كل الفضا ..

خلفك ، أمامك ، تحت ، فوق  قضبان حديد

لكن أكيد .. وعشان ما عشقك لسه صادق للوطن

راجع أكيد

راجع أكيد

مواضيع متعلقة