ونس كداب

img

يدق الباب … أقول انتِ
وعارفك لسه بيعاني ..
وطافح بالمرار قلبي
وقلبي لوحده .. بيعاني
عشان شوقك طلع سكة
وباب يتهز .. بلعاني
فارقنا الحظ في السكة
واكدب روحي .. بلعاني
واحس لوحدي بالوحدة
وإن الدنيا .. بلعاني …
في ريحة بكرة متغرب ..
وانا واقف أسير ع الباب
ومتسلسل بشوق باهت
ومتشعلق كما اللبلاب
لا طايل أرض تحضني
ولا قلبك .. فتح لي الباب
دخلت الحضرة أتونس
وأخد برضه بالأسباب
لقيت طيفك بيبعدني عن الحضرة
حلفت بسورة البقرة .. وبالإخلاص
لاعيش زاهد مع نفسي
وقوتي ضلة السدرة
حاودع دنية الأصحاب ..
وأصاحب نفسي
واتونس مع الوحدة
عشان الوحدة أرحم لي
أعيش تاني ف ونس كداب

——————————
الكويت في 22/7 / 2015

مواضيع متعلقة