أعلنت صفصافي على صدرك

img

لحنك نشاذ
فمتعزفيش الليله أوجاعك
ولاتصرخيش
أنا مستحيل اسمع عويل مبينتهيش
لساكي فاكراني هسيبك تنزفيني فوق جروحك أسبرين
بطلت أبقى مرهمك أو بلسمك
وانتي يوماتي تبدريني دمعتين
والضحكتين الخضر تهديهم بلاش
للي ملوش الحق فيكي
والمشتريكي للبكا بتهيئيه
وبتخذلي وشه اللي طاعن ف الشقا
فبينسلخ
تتصوري
رغم ان لسه باعشقك
وانتي اللي عشقك بربري
تتصوري
أعلنت صفصافي على صدرك وقسمتني نصين
وقسمتني عشرين
وزعتني أوركسترا تعزف بكا
يستطعموها المحرومين
وعزمت إني أكرهك
فمتفرحيش ولاتحزنيش
اياكي تاني توعديني باللقا
أو تخدعيني بكلمتين
يانخله ضنت بالرطب أو بالجريد المستباح
هزي إليكي بالعطب
يتساقط الحبل اللي خانق سكتي
واستبدل اسمك بالبراح

مواضيع متعلقة