زى احتمال

img

زى احتمال ان المخاض يجي فتتفزعى
وتهزى جزعى
أسقط الاحلام رطب
تاكليها من تحتى
وتعيشى باقى المعجزه
ثم إذا
بدأ الشعور اياه يصيبك
أختليبك
واستمر معاكى برقص
حتى لو ده بيكسفك
وانا بس عايزك
تشتهى اللى انا بشتهيه
ساعة مابسرح واوصفك
زى احتمال اللقا
بين الغريق والبر
طعمك وريحتك شتا
مع إننا فى الحر
قلبك ممر المشاعر فى البدن
مفتوح يعديهم
آلة زمن
بوابه للبسطاء تنجيهم
آلة زمن وازاى
حساب الوقت ماشى ف عدها
وازاى
من غير ماجذرى بيتقسم ع الشمس
بيفيض مدها
وازاى
بتتم دوره وبعدها
بتبان ملامح بكره
بتبان على وشه الإجابه
زى احتمال يبقى الوطن
ضحكتها لما اللقمه بتكفى الغلابه

مواضيع متعلقة