كل البنات أصنام

img

يااضحكتك
سر ارتباط الأوليا بالروح
صبرك رضا
أترك طريقى للهدى
مددك مدى صدر النبى المشروح

انا بيكى داير بالبخور درويش
وعنيّا فيكى باصه ع الجنه
يامكرهانى فى الصلا تناتيش
ومعلمانى ان الهوى سُنه

مين اللى قال انى نسيت الوِرد
مين اللى قال انى اتبعت الزيف
صادق معاكى مش مجادله وعِند
أصلا أنا فى الكذب مش حريف

يااا ميتى الطاهره
الشهره عنك مصدرك للضوء
واشرف تقاليد المُصاهره
ساعة إيديا ماتنهلك لوضوء

مين اللى قال انى منيش مخلوق
من ضلعك اللى ف صدر بكره المعنوى
مين اللى قال انى منيش من فوق
نازل بقلبى المستقيم المهدوى

نازل بحبك .. أوى
نازل بخاف الكفر بيكى وبالعلاقه
زعلك بسببى من الكبائر
هجرك حماقه
ماازاى اسلم للغوايه واشك انك معجزه
وان القداسه من الأزل
فيكى
وازاى راح اوصل منتهى السدره إذا
الحدت عما قد نزل
بيكى
او اننى بالقصد أحللت الحرام
وازاى اأذن بالغرام
وانا مدى ضهرى لقبلتك

يادعوتك
سبقت خروج الناقه من بطن الجبل
اللى قصاد بيتنا
كى يهتدى من لم يطع صالح محبتنا
كى تصبحين على جموع العاشقين
بيقولوا فينا من العجب أمثال
وبيمدحوا سلسال رسل امنوا ان روح الله
باركت حواديتنا

لسانى بطلعلك سماكى الاولى طاير ع البراق
لسانى غير مؤمن بمن أسماه ابليس الفراق
لسانى هدهد والنبأ
ان انتى بلقيسى وسبأ
مطرح لقانا الأولى
وانا مش ولى
لكن انتى وحى تنزلى
مع كل شمس بتمتحنا فى العقيده
مع كل تعميده لهوانا ف أصل دينا
لسانى حافظلك قديم العهد بينا
ومكمله لغاية آمين
وبالأماره موقعين
انا وانتى اهو ف آخر صحيفه
ومصدقين ان الجديد فى العهد إنا
هنعيش فى شرع المغرمين
ديناً حنيفا

يابُغيتى
مآواى فى الآخر ملاذى ودروتى
من لسعة النار اللظى
ياجنتى ونهرى
أمنيتى
بنجاتى من قهرى وتصعيد الأذى

ياجهرى والنيّه
سبحت حد الفجر
صلت لعشقك عينيا
دون انتظار الأجر
فضلت ألا أنام
وابنى لمقامك مقام
وامدح عليكى السلام
يابنت عام الفيل
كل البنات أصنام
وآمنت بالتنزيل

مواضيع متعلقة