هكذا الأوضاع تسير

img

لا احتمل
اعتقالات الدلاله فى الصور
بين القصايد والنصوص
واتهام المعنى بالتحريض على كسر الميزان
وان الحروف اللى بتشعُر
تبقى هيّا
و اللى مابتشعُر سيان
لا احتمل
اعتبار كتر الكتابه كالتجمهر
رغم انى بالتفاعل ويّا تفكيرى وميوله
وانى بـ أأثر باللى اقوله
كنت قاصد ” بنيويه ”
حتى لو شبه التظاهر
فالتظاهر
مش كما بتقولوا عنه ” تفكيكيه ”
اى ثوره ” اسلوبيه ” فى نظركم بلطجه وتخريب و عافيه
لا احتمل
ان الإيداع أصبح رقم
أخر الشعرا اللى دخلوا
للديكتاتور قافيه
لا احتمل
ان الأدله والقرائن تنقضى بيها المحاكمه
فور اصدار الديوان
والرأى للمفتى استشاره
يادولةً خفتى
م النقد قد الغاره
ومن اعتراض اراجوزى بالزماره
من انى اضج واسب والعن
ظلمهم فى عمود
وللا انتقم من غلهم والانتهاك نثرى
سيظلُ شعرى ع المدى موجود
وان اختفيتُ الى الابد ” قسرى ”
هكذا الاخلاص مجدا
هكذا الشرفاء سلفا سطروا
للخلد عهدا
ع الحيطه جوه السجن بالدم النضيف
هكذا يبقى الوطن
ألفٌ ولام تعريف
لا بالتلون / فـ ـالتملق / فـ التسلق
فـ المسح جوخ
الناس بتتحول مسوخ
والفرصه ميكب سحرها فى الوش
تزييف وغش
أوفر أوى ساعة المقابله
والدنيا لعبة عمرها
ابليس ونبله
او قوس وسهم وايد ( نيشانجى )
ويكسب الحريف
لكن تظل الفكره برضه بتحترم فيا الضمير
لكن يظل النظم منى شكله غير
باسعد اذا التركيبه والادوات جميعا بالمقاس
واحزن اذا ماالحاله حدفت غصب عنى ع التناص
بينما ضحك الرصاص
ساعة إختلاس الحلم م القلب الضعيف
ساعة الجاسوس اللفظ قال :
أهوى التلاعب بـ المخارج
أهوى انتحال صفة الخوارج
واختصار السنه فى المسواك وحمل السيف
هكذا
أضرب لكم مثل الجميع
عل المثل ينبئ لكوا بآيه
متكلمٌ عنّا فى حين
ان الحدث كان باشتراك الكل إلايا
( هامش )
هكذا الادباء مثل ( الشيف )
يجهزون
ينرفزونا
يقطعون
فيفزعونا
ويسلقون ويطبخون ويلبخون
ويسموا ذاك اللبخ فى المعرض كتاب
( اعظم الوصفات )
وبطفاسه الهرى منها دوسنا فيه بالمغرفه
واتغابينا
( عوده للمتن )
هكذا نحن استبينا
اننا بنحمل صفات
غير مدركينها
وان فى قدرات عجيبه
نمتلك منها
الكثير
هكذا الاوضاع تسير
غير ماكانت امس بادئه
إلايــــا كاتب هكذا
قررت ادور ع المصير
لا انتظر فجأة
وقرارى خادته من وانا ف عمر الصبى
قررت اكون ( شاعر )
لسه بعرق النخوه حى
لسه بصفاء النيّه ضى
بالمسك ريحة بكره جى
جى للبسطاء ( نبى )

مواضيع متعلقة