انا استاهل

img

انا استاهل

 

و بلعن سلسافين قلبى عشان أعمى و حبك يوم
و بكره يوم قلقت عليك و من قلقى ماشوفتش نوم
و بكره يوم
رضيت تسحبنى من جيبك و تسحرنى ..
تحولنى يمامة بيضا فوق ايدك
تنور كهفك الجاهل و تتمايل على جيدك
فتخضر الصحارى فيك و تتسكر عناقيدك
انا استاهل
رضيت أتمد ف الصندوق
عشان بالهجر تقسمنى الى نصين
بيتراشقوا قصاد منى
بقيت محتاجة ألملمنى
رفعت الرول ل قاضى حقوق لخالق يعلم الهفوة و ما أخفى
عن المخلوق
انا استاهل
عطيتك فرصة بالكامل
تهمشنى تهشهشنى وتنهشنى أكاذيبك
أنام فى جرابك المليان من الشكوى و م الحرمان
وانت ببدلة السهرة مع السحرة
بتستعرض ألاعيبك
فبيصقف لك الشيطان و يترجاك تعيدها كمان ..
ومش عيبك
انا أستاهل
عشان صدقت ان انت من الاشراف
بتفهم قبل مااتكلم
خبير أرصاد لحال الطقس جوايا
عليا تخاف
لكنى أعيش و أتعلم
عرفت تخطى فى العتمة
و تتسند على الجدران
و تتعرف على الدهاليز
وفك الشفرة و التعويذة و خطوطها
و تكشف سر فرعنة المشاعر ايه
و تكشف سر تحنيطها
و سكتها اللى مابتنشاف
و حطيتها فى بؤرة ضوء
و هميت بيها حب و شوق
فطلبت حقها بإنصاف وكل هدوء
و قفلت كل أبوابها عليك إنت
وغطى الضهر و الأكتاف
ستاير شعرها الهفهاف
و قالت لك خلاص هيت
وبدأت تحكى حدوتة
و قبل ماتوصل التوتة
ندهت وقولت ياسياف
انا ….

.. د / نادية فتيحة

مواضيع متعلقة