حكاوي الليل

img

بنحضن حلمنا في الليل
ونسرح لما بنغمض
نفضفض فيه
ونحكي له
دموعنا الدافيه ف النني
بتعزفنا مواويله
يعدي العمر في غفله
و هدت حيل
و حال الكل من حالي
وشوش من بره مبتسمه
وجوه القلب فيه مواويل
دا قطر العمر بيسرع
لا يوم هدي
سعاده بعيده عن عمري
ولا شوفت الامل عدي
ولو جاني الفرح مره
يصد الحزن 100 صده
و ليه يا ضحكتي شارده
أشوف العمر يتسرسب
ويسألني
هاشوف بكره ؟
ويطلع من ضلام الليل
نهار بيحب ما يكره ؟
طفولتي
شايفها غنوايه
شقاوه ولعب وبراءه
بعشق حليم
وروح ورده
ندندن في نجوم الليل وتحكلنا
ونفطس ضحك م الحواديت
عن العفاريت
وابو سويلم
لسان زالف وفرقله
معاه البيه بكرافته
لكن قله
وينفخ كرشه ب كازوزا
وكل الخلق تتكرع
من القله
عن الحراميه والعسكر
علي بابا
مركب دقن شيخ منصر
عن النداهه…..والميه
و نجم يغني ويا امام
يااااا بهيه
عن الكتاب….وسيدنا
نسمع سورة (الكوثر)
قوام بيعلق الفلكه
عشان نعرف نقول (أبطر)
وكل الفصل بيكركر
ونفطس ضحك ونكمل
حكايه بعدها حكايه
و نكته تشد في النكته
ولو نزهق من القعده
نكملها استغمايه
وكات الضحكه ورديه
فطار رمضان وطبليه
ياشيخ (رفعت )
آدانك للجميع جامع
يلم لحد سابع جار
وكل الحاره كات عيله
قلوب الناس في عز الحر ضليله
تخضر في النفوس معروف
و مكاوي بروح حداد يسحرنا
بنقره ترقص البازه
خشوع الفجر بلذاذه
يقولي اصحي يا نايم
مفيش غير الإله دايم
وليه يا ضحكتي شارده؟
ولهفتنا لحضن الام
ليه بارده؟
وباقي في عمري كام ثانيه
وكام ساعه
وكام ليله
وهل فيه فرحه ياحليله؟؟؟
أوزعها علي الاحباب
دموعي ليلاتي اخبيها
في جزع التوته واللبلاب
سهينا كتيييييييير علي روحنا
وساب العمر شيب فينا
وشاب العمر
ف شقينا
وتاهت صحبة الاحباب
بيخنقني
أمل كداب
يناديني إله الكون
و نغم النقشبندي في قلبي يهمس لي
واقول وياه
(يا مولاي
اني ببابك
قد بسطت يدي
من لي الوز به
الاك يا سندي)

—————–
من ديوانى الجديد (حكاوى الليل)

مواضيع متعلقة