روح

img

يا روح الروح
لفين ما نروح
بقينا خلاص
في روح واحده
ما ينفعشي نكون نصين
أنا وقلبي
يا روح قلبي
بنشتاق لك
وتسرح روحي في عبيرك
وعطر الدنيا يملاني
ويملا شفايفي من أسمك
وبسكر لما بندهلك
الف الدنيا بكعابي
أشوفك
صبح عنابي
غزال بيدق علي بابي
يطير قلبي
ويفتح لك
تدوب النظره ف عيونا
وبيدوب الخجل بينا
ستاير عشقنا الدايبه
تبات ويا الحنين سايبه
بشاير حب من همسي
تملي عيوني من نورك
تنامي جوه بين رمشي
واغطيكي بجفون قلبي
نقول للحزن
قوم امشي
يا وردة عمري
محتاج لك
تضمي في الغرام قلبي
ودقاته هاتفرح بك
ونمشي السكه من تاني
أشيلك بين دراعاتي
أضمك جوه احضاني
وهايفيض الحنان فينا
فلا دنيا تصحينا
وننسي العمر وسنينه
وأكتب فوق علي جبينه
ياكل منايا
أنا وعدك
وسعدي كله يوم سعدك
يا روح الروح
لفين مانروح
بقينا خلاص في روح واحده
ماينفعشي نكون نصين

——————
من ديواني (عصفور الروح)

مواضيع متعلقة